سيد البلد "سيد الموقف".. وما تهزكم "عثرة" رواندا..

خسارة الهلال أمام موكورا في الأراضي الرواندية؟ نعم، حصلت، لكنها في حسابات الكبار “عادية جداً” وما بتنقص من قدر الأزرق شبر. الحقيقة الماثلة قدام الجميع إنو الهلال، رغم التعثر العابر ده، لسه قاعد في “الصدارة” ومتربع على القمة بثبات وثقة، والصدراة دي ما جات “عطية مزين” ولا صدفة، دي شغل منظومة وعرق رجال.

المباريات الزي دي هي “المحك” الحقيقي للجهاز الفني، وفرصة “قراية أعمق” لانو المكنات بتجلي أحياناً عشان تورينا مواطن الخلل ونكتشف حلول جديدة. المستر ريجيكامب اتعامل مع اللقاء ده بـ “نفس طويل” وعقلية استراتيجية، فتح المجال لعدد من اللاعبين عشان “يورونا عرض أكتافهم” ويثبتوا قدراتهم، وده بأكد إنو الزول ده ما شغال “رزق اليوم باليوم”، بل بخطط لموسم طويل وتقيل ومليان تحديات.

ولازم الناس تعرف و”تخت في بالها” إنو الركائز الأساسية والتقيلة ما سافرت أصلاً لمواجهة موكورا، بل قعدوا في كيغالي عشان يواصلوا “الردم” في برنامج خاص ومكثف تحت إشراف “المعلم” سليم الأبرق. الشغل الجد بكون “في الخفاء” وهو اللي بيصنع الفارق في المواعيد الكبرى، والهلال “زيتنا في بيتنا” وعارف كيف يجهز نفسه للمهمات الصعبة.

كل الدعم للمستر ريجيكامب، والمشوار لسه في بدايته، وسيد البلد “سكة البطولات” حافظها بالظلط. القادم أجمل بإذن الله، وخليكم “رايقين” الهلال بخير.

مصدر هذا المقال هو موقع www.fjajsport.com